The Paradise Movie Review: ‘జడల్‌’గా నాని ఊచకోత.. విజువల్స్ అదిరినా కథలో ఆ మ్యాజిక్ ఉందా?

The Paradise Movie Review:

The Paradise Movie Review Telugu: ‘దసరా’తో నాని మాస్ ఇమేజ్‌ను కొత్త కోణంలో చూపించిన దర్శకుడు శ్రీకాంత్ ఓదెల.. మరోసారి నానితో కలిసి చేసిన భారీ చిత్రం ‘ది ప్యారడైజ్’. జడల్‌గా నాని రగ్గడ్ లుక్‌, మోహన్‌బాబు పవర్‌ఫుల్ పాత్ర, అనిరుధ్ సంగీతం సినిమాపై భారీ అంచనాలు పెంచాయి. మరి ఈ మాస్ యాక్షన్ డ్రామా ఆ అంచనాలను అందుకుందా? నాని కొత్త అవతారం ఎంతవరకు ఆకట్టుకుంది?

సినిమా వివరాలు

చిత్రం: ది ప్యారడైజ్
నటీనటులు: నాని, కయాదు లోహర్, మోహన్‌బాబు, రాఘవ్ జుయల్, సోనాలి కుల్‌కర్ణి, ఈశ్వరీ రావు, సంపూర్ణేశ్ బాబు, తనికెళ్ల భరణి, రాజా రవీంద్ర తదితరులు
సంగీతం: అనిరుధ్ రవిచందర్
నిర్మాత: సుధాకర్ చెరుకూరి
రచన, దర్శకత్వం: శ్రీకాంత్ ఓదెల
విడుదల: సెప్టెంబర్ 24, 2026

కథ ఏంటంటే?

‘సవారీలు’ అనే సమూహం తమకంటూ అధికారిక గుర్తింపు లేకుండా తరతరాలుగా జీవిస్తుంటుంది. దేశం కోసం పోరాడిన కుటుంబాలు తమలో ఉన్నప్పటికీ ప్రభుత్వ రికార్డుల్లో మాత్రం వారికి సరైన గుర్తింపు ఉండదు. కాలం గడుస్తున్నా వారి పరిస్థితిలో మార్పు రాదు. విద్య, వైద్యం, ఉపాధి వంటి కనీస అవకాశాలకు కూడా దూరంగా ఉండాల్సిన పరిస్థితి ఏర్పడుతుంది. మరోవైపు శిఖంజా మాలిక్ కుటుంబం సవారీలపై ఆధిపత్యం కొనసాగిస్తూ ఉంటుంది. ఎదురు తిరిగే వారిని అణచివేస్తూ భయాన్ని ఆయుధంగా మార్చుకుంటుంది. ఈ పరిస్థితుల్లో సమ్మక్క తన కుమారుడు జడల్‌ (నాని) ఒకరోజు తమ జాతికి నాయకుడవుతాడని ఆశిస్తుంది. కానీ జడల్‌కు తన తల్లితోనే ఎందుకు దూరం? చిన్న వయసులో జైలుకు ఎందుకు వెళ్లాడు? ‘జడల్’ అనే పేరు వెనకున్న కథ ఏంటి? సుబ్బు అతని జీవితంలోకి ఎలా వచ్చింది? చివరకు తనవారి గుర్తింపు కోసం జడల్ పోరాడాడా? అన్నదే మిగతా కథ.

సినిమా ఎలా ఉంది?

‘ది ప్యారడైజ్’లో కథ కంటే ముందుగా ప్రేక్షకుడిని ఆకట్టుకునేది దాని ప్రపంచ నిర్మాణం. సవారీల జీవన విధానం, వారి ప్రాంతం, కాస్ట్యూమ్స్, సెట్స్, కెమెరా వర్క్‌తో దర్శకుడు ఒక ప్రత్యేకమైన వాతావరణాన్నిసృష్టించే ప్రయత్నం చేశాడు. ప్రారంభ సన్నివేశాలు ప్రేక్షకుడిని త్వరగా కథలోకి తీసుకెళ్తాయి. ముఖ్యంగా జడల్ చిన్ననాటి నేపథ్యం, అతని జడలు, పచ్చబొట్టు వెనకున్న కారణాలను వివరించే భాగాలు ఆసక్తి కలిగిస్తాయి. జైలు నేపథ్యంలో వచ్చే యాక్షన్ బ్లాక్ కూడా నాని పాత్రను బలంగా పరిచయం చేస్తుంది.

ఫస్టాఫ్‌కు ప్లస్ అదే..

మొదటి భాగంలో జడల్ పాత్రను నిర్మించిన తీరు సినిమాకు ప్రధాన బలం. నాని గత సినిమాల్లో కనిపించిన సహజమైన నటనకు పూర్తి భిన్నంగా ఇక్కడ రగ్గడ్, వైల్డ్ యాక్షన్ అవతారంలో కనిపిస్తాడు. అయితే హీరో జైలు నుంచి బయటకు వచ్చిన తర్వాత కథ వేగం కొంత తగ్గుతుంది. జడల్–సుబ్బు మధ్య ప్రేమకథకు ఎక్కువ స్పేస్ ఇచ్చినా భావోద్వేగంగా బలమైన ప్రభావం కనిపించదు. ఇంటర్వెల్‌కు ముందు వచ్చే కీలక సన్నివేశాలు మాత్రం కథను మళ్లీ ట్రాక్‌పైకి తీసుకొస్తాయి.

సెకండాఫ్‌లో యాక్షన్ ఎక్కువ

శిఖంజా మాలిక్–జడల్ మధ్య పోరు మరింత బలంగా ఉంటుందని ద్వితీయార్ధంపై అంచనాలు పెరుగుతాయి. కానీ ఇక్కడే సినిమా కొంత తడబడుతుంది. సంఘర్షణను మరింత లోతుగా తీసుకెళ్లడం కంటే భారీ యాక్షన్ సన్నివేశాలు, రక్తపాతం, హీరో ఎలివేషన్లపై ఎక్కువ దృష్టి పెట్టిన భావన కలుగుతుంది. ఒక దశ తర్వాత కథలో కొత్త మలుపుల కంటే ఫైట్స్‌నే ఎక్కువగా చూడాల్సి వస్తుంది. హింసాత్మక దృశ్యాలు కూడా ఎక్కువగా ఉండటంతో ఈ తరహా సినిమాలను ఇష్టపడని ప్రేక్షకులకు కొంత ఇబ్బందిగా అనిపించవచ్చు. చివర్లో పొలిటికల్ టచ్ క్లైమాక్స్‌కు దగ్గరగా వచ్చే రాజకీయ నేపథ్యంలోని కొన్ని సన్నివేశాలు సినిమాకు కొత్త ఉత్సాహాన్ని తీసుకొస్తాయి. ఎమ్మెల్యే శంకర్ పాత్ర, ముఖ్యమంత్రి నేపథ్యంలోని సన్నివేశాలు, తెలంగాణ రాజకీయ వాతావరణాన్ని గుర్తుచేసే కొన్ని డైలాగులు ప్రేక్షకుల దృష్టిని ఆకర్షించేలా ఉన్నాయి. ఇవి కథలో మరో ఆసక్తికరమైన లేయర్‌ను జోడిస్తాయి.

‘జడల్‌’గా నాని ఎలా చేశాడు?

సినిమాకు అతిపెద్ద బలం నాని. జడల్ పాత్ర కోసం తన శరీర భాష నుంచి లుక్ వరకు పూర్తిగా మార్చుకున్నాడు. యాక్షన్ సన్నివేశాల్లో అతని ఎనర్జీ స్పష్టంగా కనిపిస్తుంది. ఇప్పటివరకు ‘నేచురల్ స్టార్’గా ఎక్కువగా చూసిన ప్రేక్షకులకు ఇందులో పూర్తిగా భిన్నమైన నాని కనిపిస్తాడు. రగ్గడ్ లుక్, పొడవాటి జడలు, టాటూలు, యాక్షన్ బ్లాక్స్‌తో పాత్రను నాని బలంగా మోశాడు.

Banana Papaya Combination: అరటి–బొప్పాయి కలిపి తినకూడదా? సోషల్ మీడియాలో వైరల్ అవుతున్న వాదనలో నిజమెంత?

మోహన్‌బాబు ఎలా ఉన్నారు?

శిఖంజా మాలిక్‌గా మోహన్‌బాబు పాత్రకు మొదట ఇచ్చిన బిల్డప్ ఆకట్టుకుంటుంది. ఆయన స్క్రీన్ ప్రెజెన్స్, డైలాగ్ డెలివరీ కొన్ని సన్నివేశాల్లో పాత మోహన్‌బాబును గుర్తు చేస్తాయి. అయితే పాత్ర నుంచి ఆశించిన స్థాయిలో పూర్తి స్థాయి ప్రభావాన్ని కథ చివరివరకు కొనసాగించలేకపోయిన భావన కలుగుతుంది.

కయాదు లోహర్, రాఘవ్ జుయల్

సుబ్బుగా కయాదు లోహర్ అందంగా కనిపిస్తుంది. నానితో ఆమె కెమిస్ట్రీ కొన్ని చోట్ల బాగున్నా ప్రేమకథ మాత్రం కథకు పెద్ద బలంగా మారదు. రాఘవ్ జుయల్ తనకు ఇచ్చిన పాత్రలో ప్రత్యేకమైన బాడీ లాంగ్వేజ్‌తో ఆకట్టుకునే ప్రయత్నం చేశాడు.

సోనాలి కుల్‌కర్ణి, ఈశ్వరీ రావు తమ పాత్రలకు తగ్గట్టుగా నటించారు. సంపూర్ణేశ్ బాబు కనిపించే సన్నివేశాలు కొంత రిలీఫ్ ఇస్తాయి.

విజువల్స్ అదిరిపోయాయి

సాంకేతికంగా ‘ది ప్యారడైజ్’ భారీ స్థాయిలో కనిపిస్తుంది. సినిమాటోగ్రఫీ ప్రధాన ఆకర్షణ. కొన్ని వైడ్ షాట్స్, యాక్షన్ సన్నివేశాలు, భారీ సెట్స్ తెరపై గ్రాండ్‌గా కనిపిస్తాయి. ప్రొడక్షన్ డిజైన్ విషయంలో నిర్మాతలు ఎక్కడా రాజీపడలేదనే విషయం స్పష్టంగా తెలుస్తుంది. అయితే కొన్ని చోట్ల భారీ సెటప్ సహజమైన ప్రపంచంలా కాకుండా సెట్‌లా కనిపించడం మైనస్.

అనిరుధ్ సంగీతం

అనిరుధ్ పాటలు సినిమాకు ఎనర్జీ తీసుకొచ్చాయి. ‘ఆయా షేర్’, ‘ఏష నాగుల’ వంటి పాటలు పెద్ద తెరపై మాస్ ఆడియన్స్‌ను ఆకట్టుకునేలా ఉన్నాయి. అయితే కొన్ని యాక్షన్ సన్నివేశాల్లో నేపథ్య సంగీతం, సౌండ్ మిక్సింగ్ మరీ ఎక్కువగా ఉండటంతో డైలాగ్స్ స్పష్టత తగ్గిన అనుభూతి కలుగుతుంది.

శ్రీకాంత్ ఓదెల ఎక్కడ తడబడ్డారు?

దర్శకుడిగా శ్రీకాంత్ ఓదెల విజువల్ స్కేల్ విషయంలో తన మార్క్ చూపించాడు. సవారీల ప్రపంచం, జడల్ లుక్, భారీ యాక్షన్ ఎపిసోడ్స్, కొన్ని ఎమోషనల్ సన్నివేశాల్లో అతని విజన్ కనిపిస్తుంది. కానీ కథ, స్క్రీన్‌ప్లేలో అదే స్థాయి బలం కనిపించదు. గుర్తింపు కోసం అణగారిన సమాజం చేసే పోరాటం అనే మంచి పాయింట్ ఉన్నప్పటికీ, దాన్ని మరింత కొత్తగా చెప్పే అవకాశం పూర్తిగా వినియోగించుకోలేకపోయిన భావన కలుగుతుంది.

ప్లస్ పాయింట్స్

నాని నటన
విజువల్స్
ప్రొడక్షన్ డిజైన్
ఫస్టాఫ్‌లోని కొన్ని సన్నివేశాలు
అనిరుధ్ పాటలు
భారీ యాక్షన్ బ్లాక్స్

British Airways Emergency Landing: 37 వేల అడుగుల నుంచి 9 వేల అడుగులకు దిగిన విమానం.. అసలేం జరిగింది?

మైనస్ పాయింట్స్

కొత్తదనం తక్కువగా అనిపించే కథ
సెకండాఫ్ స్క్రీన్‌ప్లే
బలంగా పండని ఎమోషన్స్
అధిక హింస
కొన్ని చోట్ల సౌండ్ మిక్సింగ్

చివరిగా..

‘ది ప్యారడైజ్’ నాని నటన, భారీ విజువల్స్, మాస్ యాక్షన్‌తో ఆకట్టుకునే ప్రయత్నం చేసిన సినిమా. కానీ అదే స్థాయిలో బలమైన కథ, భావోద్వేగాలు తోడై ఉంటే ఫలితం మరింత ప్రభావవంతంగా ఉండేది.

నాని కొత్త మాస్ అవతారం కోసం, భారీ యాక్షన్ సినిమాలను ఇష్టపడే ప్రేక్షకులకు ఇందులో ఆసక్తికరమైన అంశాలు ఉన్నాయి. కథ, స్క్రీన్‌ప్లేకు ఎక్కువ ప్రాధాన్యం ఇచ్చే ప్రేక్షకులకు మాత్రం అనుభవం మిశ్రమంగా అనిపించవచ్చు.